September 22, 2019

អតីតប្រធានាធិបតីប្រទេសប៉េរូលោក Alan Garcia ធ្វើអត្ដឃាតបាញ់ស្លាប់ខ្លួនឯង ដោយសាររឿងពុករលួយ និងលាងលុយកខ្វក់

អតីតប្រធានាធិបតីប្រទេសប៉េរូលោក Alan Garcia ត្រូវបានគេរាយការណ៍ថា បានស្លាប់ដោយសារបាញ់សម្លាប់ខ្លួនឯង ស្របពេលប៉ូលិសកំពុងរៀបចំឃាត់ខ្លួនគាត់កាលពីព្រឹកថ្ងៃពុធ ទី១៧ ខែមេសា ម្សិលមិញនេះ។ ការស្លាប់របស់គាត់ត្រូវបានបញ្ជាក់ដោយប្រធានាធិបតីបច្ចុប្បន្នលោក Martin Vizcarra ដែលគាត់បានសម្តែងការសោកស្តាយតាមរយៈបណ្តាញសង្គម Twitter ។ លោក Alan Garcia ធ្លាប់បានបម្រើការជាប្រធានាធិបតី ២លើក កាលពីឆ្នាំ ១៩៨៥ ដល់ ១៩៩០ និងពីឆ្នាំ ២០០៦ ដល់ ២០១១ ហើយមុនឈានដល់ការធ្វើអត្តឃាតបាញ់សម្លាប់ខ្លួនឯងនេះ គាត់កំពុងស្ថិតនៅក្រោមការស៊ើបអង្កេតទាក់ទិននឹងការលាងលុយកខ្វក់ និងទទួលសំណូករឿងអាស្រូវពុករលួយដ៏ធំរបស់មេដឹកនាំអាមេរិកឡាទីនមួយចំនួន។

លោក Carlos Moran រដ្ឋមន្រ្តីក្រសួងមហាផ្ទៃបានប្រាប់ទូរទស្សន៏ CNN របស់ប៉េរូថា នៅពេលដែលក្រុមប៉ូលីសបានមកដល់ផ្ទះគាត់ ដើម្បីអនុវត្តដីកាចាប់ខ្លួននៅម៉ោង ៦ និង ៣០នាទីព្រឹក លោក Alan Garcia បាននិយាយថា គាត់សុំពេលរង់ចាំមេធាវីរបស់គាត់សិន រួចហើយគាត់ក៏បានចូលទៅសំងំក្នុងបន្ទប់របស់គាត់។ មួយសន្ទុះក្រោយមកសំឡេងគ្រាប់កាំភ្លើងត្រូវបានបន្លឺឡើង ហើយលោកត្រូវបានគេប្រញាប់បញ្ជូនទៅមន្ទីរពេទ្យភ្លាមៗដែរ ប៉ុន្តែក្រោយធ្វើ CPR ៣ដង គ្រូពេទ្យក៏មិនមានសមត្ថភាពអាចស្រោចស្រង់ជិវិតគាត់បាននោះឡើយ។ យ៉ាងណាមិញលោក Alan Garcia វ័យ ៦៩ឆ្នាំ ត្រូវបានមេធាវីលោក Erasmo Reyna បញ្ជាក់ថា ការស្លាប់របស់គាត់គឺដោយអត្តឃាតបាញ់ភ្ជង់នឹងក្បាលខ្លួនឯង៕

អត្ថបទ៖ លីដា
ប្រភព៖ Khmer Note

FILE – In this Oct. 1, 2010 file photo, then Peru’s President Alan Garcia arrives for an emergency meeting with other South American leaders in Buenos Aires, Argentina. The former Peruvian president Alan Garcia on Tuesday, Aug. 1, 2017, to give his version of alleged irregular acts in one of the contracts that the Brazilian company Odebrecht handled, with which he said he had no illicit relationship. (AP Photo/Eduardo Di Baia, File)